Buda, Llanes, Asturies.
G.E. Gorfolí / S.E.B. Escar / A.D. Cuasacas / S.E. Lenar / G.E.S. de la S.E. de Málaga
2011-2012.
Desendolcu: 639 m.
Desnivel: 35 m. (+34/-1).
(topografía parcial, avientu de 2012).
Coordenaes: UTM 30T X: 347.097, Y: 4803.926, Z: 155 m.s.n.m. (dátum WGS84)
Asitiamientu: La cueva atópase na rodiada del caseríu de Llan Amieva, nel valle de Caldueñu, conceyu Llanes, cerquina tamién de los pueblos de Buda y Las Xareras. Asítiase na cabecera del ríu de Rufresnu, que mécese col ríu de Caldueñu en Llan Amieva, ríu del que la cueva homónima ye’l manantial.
Xeoloxía: Roca caliar prieto y llaminao (Formación Barcaliente) del Carboníferu superior (Namuriense).
Descripción: L’amplia entrada mantién nicios de correr l’agua per ella n’époques de xorrecía. En seca l’agua surde ente pequeños costeros baxu la entrada. A los pocos metros de desendolcu el techu baxa obligádonos a progresar de rodiyes dica llegar a una poza d’agua que ye l’entamu d’un sifón temporiegu. Magar que ye cortu y fácilmente merguyable hai qu’andar sollerte en casu de percorrer la cueva cuando el nivel del agua tea altu. Podríe dase’l casu de sifonase en pocu tiempu.
Tres del sifón algamamos una sala grande con abondo sable onde llega’l ríu pela manzorga. La continuación agües arriba ye cómoda per una galería activa de techu altu. Dellos metros más allá atopamos una gran resquiebra de paredes verticales onde vemos una inscripción de los primeros esploradores del OUCC.
El ríu cuerre pela galería abierta a favor de les resquiebres asociaes a la resquiebra nomada, estrechando n’algunos llugares dica llegar a un sifón. Unos metros enantes una esguilada fácil, que nun necesita cuerda, da pasu a un pisu superior del meandru, de midíes más anches y una saluca. Equí podemos percorrer una galería cimera que algama + 34 m. y que empobinase al norte con morfoloxía meandriforme. Pel otru llau de la salina, y arrodiando un pozu de 3 m. qu’empata col estrechu meandru percorríu pel ríu, entramos n'un guapu meandru con dalgunos aportes d’agua llaterales que desfóndase permitiendo ver abaxu l’estrechu calce del ríu. Un nuevu ensanchamientu del meandru fainos baxar al ríu al entamu d’una galería grande. Esta galería fina n’una sala de sable na poza d’un sifón.
El sifón (30 /-4) tien el fondu de sable y grava, y ye una amplia galería somorguiada de 1,5 m. d’altura na so parte más baxa. Al otru llau, la nueva galería aérea ye una poza de paredes verticales de roca prieto perguapa. L’agua llega a esta poza per un meandru altu y perafayaízu, y continua asina dica una sala onde un tombayón de 4 m. dexa cayer l’agua. Tornando unos metros p’atrás puede esguilase fácilmente ente les paredes del meandru dica algamar el calce superior ensín pelear col tombayón.
Equí la galería ye entá más grande mentantu unes decenes de metros, tornando a estrechase’l meandru y obligándonos a esguilar en oposición peles paredes p’algamar un nivel superior. Abriose una esguilada artificial más segura y más cómoda y a esi nivel el meandru ye sensiblemente más cómodu, magar que tuvimos qu’equipalu con un pasamanos de 50 m. de llargor pa evitar el riesgu de caídes al fondu’l meandru. Al final del meandru entama una corta galería casi colmatada poles formaciones que tres dellos metros baxa’n rampla dica la poza del segundu sifón. El día que se plantegó merguyar n’esti sifón desbordose una poza qu’hai un poco más arriba na galería mentantu’l trasiegu de xente y material. Esto veyó l’agua de tal manera que foi imposible merguyar ya que nun había visibilidá dala. Pero, sorprendentemente, cuando tornamos al calce activu atopamos l’agua veyao, lo que nos fai suponer que’l segundu sifón nun ye un sifón colgáu sinon que tien dalguna relación col ríu. Esi mesmu día tuvimos problemes col compás y el clino y nun pudimos topografiar, asina que la punta de topografia ta nel entamu de la esguilada artificial.
Hestoria: La cueva ye conocida d’antiguu pola xente de Caldueñu, especialmente polos vecinos de Buda y Las Xareras, qu’en época de seca abastecíense d’esti manantial. Nel planu espeleolóxicu, les primeres referencies a la cueva son del Oxford University Cave Club, al entamu la década los setenta, qu’esploren hasta’l sifón y asoleyen una descripción de la cavidá, a la que nomen “Cueva de Buda”. Nun tenemos más referencies d’esploraciones na cueva hasta les presentes campañes del 2011 y 2012.
Toponimia: El nome patrimonial de la cueva ye “Cueva de Rufresnu”, magar que fora asoleyada como “Cueva de Buda” polos espeleólogos británicos.
Bioloxía: Citar qu'atopamos na zona averada a la entrada la cueva una sacabera rabillarga (Chioglossa lusitanica).
Andecharon nos trabayos: L'equipu de merguyu integrenlu X.F. Manteca, R. Bernardo, A. Glez. Rajo, O. Cuadrado (por parte del G.E. Gorfolí), G. Sánchez (S.E.B. Escar), A. Gª Madrera (A.D. Cuasacas), J. Lusarreta (S.E. Lenar), y D. Pérez (G.E.S. de la S.E.M.), col sofitu de L. Marcos, E. Bernardo, A. Manteca (G.E. Gorfolí), B. Santa Cruz, y P. Solares (S.E.B. Escar), que tamién andecharen na esploración y topo de los tramos non inundaos. El testu d'esta reseña ye de X.F. Manteca y P. Solares; les semeyes de R. Bernardo.
Enllaces d'interés:
-Vídeo de la Cueva de Rufresnu, grabáu y montáu por J. Lusarreta: Parte 1. Parte 2.
-Descripción de la cueva na memoria de la espedición del OUCC de 1970, n'esti enllaz.
- Proyección de la poligonal sobre la ortofoto -
2011-2012.
Desnivel: 35 m. (+34/-1).
(topografía parcial, avientu de 2012).Coordenaes: UTM 30T X: 347.097, Y: 4803.926, Z: 155 m.s.n.m. (dátum WGS84)
Asitiamientu: La cueva atópase na rodiada del caseríu de Llan Amieva, nel valle de Caldueñu, conceyu Llanes, cerquina tamién de los pueblos de Buda y Las Xareras. Asítiase na cabecera del ríu de Rufresnu, que mécese col ríu de Caldueñu en Llan Amieva, ríu del que la cueva homónima ye’l manantial.
Tres del sifón algamamos una sala grande con abondo sable onde llega’l ríu pela manzorga. La continuación agües arriba ye cómoda per una galería activa de techu altu. Dellos metros más allá atopamos una gran resquiebra de paredes verticales onde vemos una inscripción de los primeros esploradores del OUCC.
El sifón (30 /-4) tien el fondu de sable y grava, y ye una amplia galería somorguiada de 1,5 m. d’altura na so parte más baxa. Al otru llau, la nueva galería aérea ye una poza de paredes verticales de roca prieto perguapa. L’agua llega a esta poza per un meandru altu y perafayaízu, y continua asina dica una sala onde un tombayón de 4 m. dexa cayer l’agua. Tornando unos metros p’atrás puede esguilase fácilmente ente les paredes del meandru dica algamar el calce superior ensín pelear col tombayón.
Toponimia: El nome patrimonial de la cueva ye “Cueva de Rufresnu”, magar que fora asoleyada como “Cueva de Buda” polos espeleólogos británicos.
Bioloxía: Citar qu'atopamos na zona averada a la entrada la cueva una sacabera rabillarga (Chioglossa lusitanica).
Andecharon nos trabayos: L'equipu de merguyu integrenlu X.F. Manteca, R. Bernardo, A. Glez. Rajo, O. Cuadrado (por parte del G.E. Gorfolí), G. Sánchez (S.E.B. Escar), A. Gª Madrera (A.D. Cuasacas), J. Lusarreta (S.E. Lenar), y D. Pérez (G.E.S. de la S.E.M.), col sofitu de L. Marcos, E. Bernardo, A. Manteca (G.E. Gorfolí), B. Santa Cruz, y P. Solares (S.E.B. Escar), que tamién andecharen na esploración y topo de los tramos non inundaos. El testu d'esta reseña ye de X.F. Manteca y P. Solares; les semeyes de R. Bernardo.
Enllaces d'interés:
-Vídeo de la Cueva de Rufresnu, grabáu y montáu por J. Lusarreta: Parte 1. Parte 2.
-Descripción de la cueva na memoria de la espedición del OUCC de 1970, n'esti enllaz.
- Topografía -
- Proyección de la poligonal sobre la ortofoto -
